Baydhabo,(insidesomalia.org)- Alaha u naxariistee Marxuum Xildhibaan Cismaan Maye oo ka mid ahaa Xildhibaanada ka soo jeeda qowmiyada Benaadiriga ayaa koox wejiyada soo duubtay si arxan-darro ah ugu toogtay bartamaha Magaalada Baydhabo,xili uu ka soo baxay Masaajid.

Marxuumka ayaa kooxdii weerarka ku soo qaaday la dhacay dhawr-xabadood isagoo ku quur-baxay isla goobtii uu shilkan ka dhacay.

Dilka Marxuumka ayaa ku soo beegantay xili uu maalintii shalay afkiisa ka soo baxeen hadalo dar-daaran u eg, kadib markii uu wareysi uu bixiyay uu ku yiri:

"Xildhibaano hadaan nahay maanta ma heysanno cid amaankeena sugta, Ilaah ka sokoow waxaan nahay meyd socda", kelimadaan dardaaranka u eg ayuu Marxuumka shalay wareysi ahaan u siiyay Idaacad ku taal Magaalada Baydhabo.

Ehelka Marxuum Cismaan Maye ayaa sheegay inay tahay arin laga murugoodo in qof aan waxba galabsan la dilo xili lagu gudo jirro Bil Ramadaan oo Ilaahay uu mamnuucay in dhiig Muslim ah la daadidiyo.